1Cor 10 | ASO | STEP | Ido' neze zuhokizo, O'moso'mo do ngu' izine' aleve nene inite' ne'mine mana'mine igi mili ilizaha nesi mo ngeli vi tolovo amilisave li lingine gili nilisaha nemu' aka lengelebizo lo-lengemeloze. Gililo. Lingine gili nizave. Mose' aza leli' Zuda veti avotemotine Aigita misuboukoti' ngele'mizo Kanaha misubou' novivo vilizani' aka ngelebizelive lo O'moso'mo do soto' o-ngidine' limuso'mi mumunou' nene muki' ingine vani'. Ido' noso naba nene izo huko eza ema o-ngedo aka lolo' o-ngedavo muki' ingine a'mingu' vani'.

1 Corinthians 10

O'moso'mi Evenele Gozopo' Minani' Nene Monovo Goloso Di Soto' Ikevo nGibiline' Nenako Ehee Lengikisi Ne'mine O-lengedalive Losa Paulo' Hungo' Molo Line'

1 Ido' neze zuhokizo, O'moso'mo do ngu' izine' aleve nene inite' ne'mine mana'mine igi mili ilizaha nesi mo ngeli vi tolovo amilisave li lingine gili nilisaha nemu' aka lengelebizo lo-lengemeloze. Gililo. Lingine gili nizave. Mose' aza leli' Zuda veti avotemotine Aigita misuboukoti' ngele'mizo Kanaha misubou' novivo vilizani' aka ngelebizelive lo O'moso'mo do soto' o-ngidine' limuso'mi mumunou' nene muki' ingine vani'. Ido' noso naba nene izo huko eza ema o-ngedo aka lolo' o-ngedavo muki' ingine a'mingu' vani'. 2 Ne'mine igi a'mine limusolokovo' nene e'meti guvo nosou' vi vi helala vani' ne'mo mukito' ingine Mose' zuho lili' igi noso hilani' giline'. 3 Ido' ebe' hadivelo' nene naa' inite'ine nomivo O'moso'mo noso' nite' Okulumokuti' hulo-ngedavo mukito' nani'. 4 Ido' O'moso'mo geheni naba'mi lulouti' do soto' ogo ngimine' nosouti' nene mukito' nani'. Ido' a'mine gamenelo' nene Kilisito' aza nene engikisi maka' monine' gelavo a'mine noso nene ezeloti' soto' o ngimine' ve. 5 Ee, O'moso'mo ne'mino do ngu' izine'za a'mine do ngu' iziveuti' lingela muki' nene goloso inite' di'mi ikevo O'moso aza gele goloso ogo ngebeleka' ngebeleka' ivo ebe' hadivelo' nene hili gese' ani' ve.

6 Ido' Zuda ve ingine goloso initekumu' lanite' gili di soto' i'mi vikevo O'moso'mo do soto' ogo lihime ngimine' inite' luvoni' nemu' lingine gili ingine adi'mine igi goloso initekumu' lanite' gili a'mine'mine ikelizave losa O'moso'mo alinge' soto' olonivemu' aka lelebizo ne'mine ine' ve. 7 Nemu' nene ingine linge malite ani' ne'mine igi lingine soza o'mosomu' gelekele' i-ngidi ngopo'ni li minamilo. Ingine ne'mine angumu' mono' godolou' ti' li gizi nizani' ma neive:

Evene' ingine O'mosote minelive li bulumaka' avazaha ne'mine lili' igi
opo'ni li mini mito' mini noso' nite' ni noso ni mini
oti melengeni igi di goloso igi zohi' igi minani'.
8 Ido' ma nene engikuti' vene' vemoho' gopo' napa ingi'mi monikevo O'moso'mo gamene hamokukovo' evene' 23 tauseni ngebele hiline' nenaze. Laza nene ingine adi'mine ogo vene' vemoho' gopo' napa ongamolone. 9 Ido' Guvelesi vesi golo izikevo satalite ngibilikevo hilani' nenaze. Laza ingine adi'mine ogo Guvelesi ve golo izamolone. 10 Ido' evene' linge malite O'mosola nene inite' ato atokumu' emenga laa' ido' uvonga avanga li-daa' ikevo O'moso'mo angelo' ma imiselavo ogo lihime ngemo ngibiline' nenaze. Laza nene ingine lani' ne'mino O'moso uvonga avanga lo-damolone. 11 Ido' a'mine inite' muki' mene soto' o ngimine' nene evene' laza neloti' aka ningeloningumu' ve losa soto' ine' nene gamene osu' lolosa neida mene none' aleve leli' nene ningi ne'mine amilizave li lelikumu' nene mono' godolou' luhuvo gizani' ve. 12 Nemu' nene ve ma gaza vo tolovo oga' akalo' minamo ha mine gili' lo nouve lo minelinive gaza ehee gemengu' soto' o gemavo lihime daa' akau' vo holo lemo ongalinge. Ningosa minezo. 13 Lengita lengemengu' soto' o lengemaa' neine' nene atoli'mine soto' o lengemamive. Evene' mukita soto' oga' neine' ma'mino nene soto' noo lingimive. Ido' O'moso'mo leze nene hulo-ledamoloseinako lingine ezemu' gili ele'vole' gehepeve i mini ezela lehete igi minilo. Aza nene lingivizeline' lengemengu' ma soto' o lengemeline' nene ma ninge mate lingimikamoloseive. Lengemengu' ma soto' o lengemeline' nene lingivizamivo amuzo mili ha mine gili' li minilizave lo aza nene olovo' ilizani' aka vele-lengedeleseive.

14 Ido' Mose' miningu' minave nene O'moso'mo lihime ngemo ngibiline' ma'mino lengebelalize. Nemu' nene neze zuho lu'ne lengeme nouvoni' mate, soza o'moso nene gelekele' i-ngidami ido' noso' nite' ngimilizanguti' nesi nami ngopo'ni laa' monovomu' nene olovo' igi mehedine ngimilo. 15 Lingine nene lutine gatine neive ma nene nizave losa gamazi mene lo-lengemelouze. Nemu' nene gamazi loloni' nene gihile nolihe langisetine ningi gili hehe lilo. 16 Lebeni inite' naa' nouningu' O'mosola isaa' neve lo vaini gomise Guvelesi ve'mo no'noho' izinguti' nune' ne'mo do hamo' o-ledavo naa' noune' aleve muki' nene Kilisito' vanise lepine' ne'mi gihile've ma nene dalosune. Olo. Ido' lebeni inite' beleti apilo a'minguti' nune' ne'mo do hamo' o-ledavo naa' noune' aleve muki' nene Kilisito' oko'no hulo hiline' ne'mi gihile've ma nene dalosune. Olo. 17 Ee, lebeni inite' naa' nouningu' nene beleti hamokovo' minavosa laza mukito' a'mine beleti hamo' mauti' naa' nounako nemu' nene laza mukito' hamo' zuho nene none. 18 Ido' Isilaele aleveti monovomu' mene gililo. Ingine O'moso imani' initekuti' naa' ave engi' nene O'mosola vi gi'mizaa' nave. 19 Neve nene naza nadive lo lo-lengemelesa noluve. Soza o'moso ngimani' inite' nene inite' gihile ve lo lamuve. Ido' soza o'moso inite' asi've nesi nene inite' gihile neive lo lamuve. 20 O'ove. Ne neine'za O'mosomu' gilamavete soza o'moso ngimani' inite' nene O'moso imaa' naavoba sikalahu' goloso ngimaa' naanako nemu' nene sikalahu' goloso ngimani' initekuti' nisa lingine maka' gi'mizi minilizave losa gelamuve. 21 Ido' Guvelesi vela gi'mizi mini lebeni noso've naa' niigisa sikalahu' golososi vi gi'mizi mini sikalahu' goloso ngimani' nosouti' nene nalizado' nomive. Guvelesi vela gi'mizi mini holomo'veloti' noso' nite' naa' niigisa sikalahu' golosola vi gi'mizi engi' holomolo' noso' nitekuti' nalizado' nomive. 22 Ido' ne'mine olone' nene Guvelesi ve aza nenitokovo' gi'mizilizanako lo izebolo' molaloseive. Ne'mine oloseinako leli' amuzo ne'mo O'moso'mi amuzo nene ma ivile' aminako lebelamilihe. Olo.

O'moso'mi Gulive Do Naba Iline' Initekovo' Ogo Molo Minelone Lo Paulo' Lo-ngimine'

23 Ee, lingine inite' muki' nene ha gopo gamazi'vesi nomivo ogo molo olosune laa' nani'za a'mine inite' ma nete lele'mize lamine' ma amilisave. Inite' muki' nene ha gopo gamazi'vesi nomivo ogo molo olosune laa' nani'za a'mine inite' ma nete monoku' ma hize ele' i-lidamilisave. 24 Evene' hamo hamo' lingine nene lengi' okodinemukovo' gilamisa lengi' zuho neemukisi gili mini evene' ngele'mize lamine' ilizangumu' amuzo mili minilo. 25 Ido' gamazi ma mono' godolou' ti' li gizi nizani' ma neive:

Misubo nesi ido' inite' mata' muki' a'mingu' neine' nesi nene
Guvelesi ve'mi inite' ve li gizi nizani' ve.
Ido' Guvelesi ve'mine mino ei' evenele leli' di guno' ilizave losa neine' nenaze. Ize ne'mine situvaku' nehe maketilo' nehe milanguti' ma meni hizi nali ma nene ha meni hizi nalisaze. Nemu' nene leli' lute do goloso iline' inite' soza o'moso ngimani' initekuti' nehe ido' nadi' anguti' ize neve li longo' tongo' amilo. 27 Ido' evene' Izesungumu' gili ele'vole' amaveuti' mali'mo elese molo-lengedo noso' nite' nalonge. Alo lo nolivo ma vi ha mili-lingidiliza inite' nene leli' lute do goloso iline' inite' soza o'moso ngimani' initekuti' nehe li a'minemu' longo tongo' ami ha nalisave. 28 Ne neine'za noso' nite' nalisa nizavo ve mali'mo noso' nite' mene soza o'moso ngimanguti' ve lavo ma a'mine ve'mi lulomu' nene gilisa namilo. 29 Lengi' lutine goloso ilingumu' nomive. A'mine lo-lingimive nene aza Guvelesi ve Izesu' evenele a'minguti' nalizani' nene lihime dalisanako nemu' namilizado' o neive lo lulouko gelo soza o'moso ngimanguti' ve lo lo-lingimine' noloseinako lingine nikevo eze lulo've nene goloso ogalive losa noluve.

Ido' lengitati' linge malite ti' li lilisave: Laza noso' nite' muki' malise amo nalosa geleso' nene mo naakovo' olosune. Evene' malite noso' nite' mamu' nene nalone' lihime daalone li malise ilizangumu' nene engi' lu'nido' do molo lazasi malise olone lamolosune. 30 Laza O'mosola noso' nitekumu' opo'ni losa nonalone' nene evene' malite a'mine O'mosola losa nonalone' initekumu' nene ve mene malise igi namilizani' noso' nite' ninave li lelikumu' gamazi goloso lamilizado' o neine' nenako nemu' nene ma lamilisave. 31 Ti' li lilizaha noso' nite' ma nene ha nalizahe ido' malise ilizahe ne'mine ilizangukisi ido' inite' ato ato' ilizangukisi nene O'moso'mi gulive do naba iline' initekovo' igi mili minilo. 32 Zuda ve he heta ato' ve nGiliki ve he ido' O'moso'mi zuho Kilisito' evenele he engi' neti ve'nido' nene goloso inite' dikeve li olovo' ilizani' inite' nene di soto' amilo. 33 Neni' Paulo' inite' ma oloni' nene neni' nele'mize lamine' oloseive losa amolosuve. Naza evene' mukikumu' gelo O'moso'mo do ngu' izeline' akalo' ngele'mize molalohe losa evene' ato ato' mukiliti lu'ningu' nene lamine' gililiza initekovo' olosuve.